Ардын Засгийн газрын 1923 оны шийдвэрээр байгуулагдсан Дотоод явдлын яамны дэргэдэх мал эмнэлгийн хэрэг эрхлэх газрын харьяанд Нийслэл хүрээний мал эмнэлгийг байгуулж, П.Жүрмэдийг даргаар нь, сургагч даргаар нь малын их эмч П.И.Орловыг, мэргэжлийн сургагчаар малын их эмч А.А.Дудукалов нарыг томилон 12 орон тоотой ажиллахаар баталсан байна.
Нийслэл хүрээний мал эмнэлэгт тухайн үед ажиллаж байсан малын эмч нар нь ЗХУ-аас уригдаж ирсэн хүмүүс байсан ба ганц монгол хүн байсан нь Монгол Улсын анхны малын эмч Очирын Лувсанбалдан байсан байна.
Ийнхүү шинэ үеийн Монгол оронд болон нийслэл хотод шинжлэх ухааны мал эмнэлгийн байгууллага үүсэн байгуулагдаж , түүхэнд тэмдэглэгдэн үлдсэн юм . 2013 онд Нийслэл хотод мал эмнэлгийн байгууллага байгуулагдсаны түүхт 90 жилийн ойг тэмдэглэн өнгөрүүлсэн.
Мал, амьтны эрүүл мэндийн тухай хууль батлагдан, 2018 оны 06 дугаар сарын 01-ний өдрөөс мөрдөгдөж эхэлсэнтэй холбогдуулан, 2021 оны А/13, 2022 оны А/24 дүгээр тушаалаар Нийслэлийн мал эмнэлгийн газрын бүтэц, орон тоонд өөрчлөлт орж, Дарга, улсын ахлах байцаагч, Мал, амьтны эрүүл мэндийн хэлтэс, Мал эмнэлгийн хяналт, эрсдлийн үнэлгээний хэлтэс, Лаборатори, Захиргаа, санхүүгийн хэлтэс гэсэн бүтэцтэй, 69 хүний орон тоотойгоор үйл ажиллагаа явуулж байна.
